Shtetet e Bashkuara dislokuan bombarduesit e tyre të sofistikuar B-2 Spirit për të kryer sulme ajrore precize ndaj infrastrukturës bërthamore të Iranit. Ky avion ka luajtur një rol qendror në disa nga operacionet më të rëndësishme ushtarake të forcave ajrore amerikane, duke përfshirë fushatën e bombardimeve në Kosovë, Irak dhe Afganistan.
Përdorimi i parë në luftë i B-2 Spirit ndodhi gjatë ndërhyrjes së NATO-s në Jugosllavi.
Mediumi prestigjioz amerikan “New York Times, kishte publikuar një artikull për përdorimin e B-2 Spirit në ish-Jugosllavi.
“Bombarduesi i fshehtë B-2, avioni më i shtrenjtë dhe më i ndërlikuar i ndërtuar ndonjëherë, bëri debutimin e tij luftarak dje në një botë shumë të ndryshme nga ajo për të cilën është projektuar”, thuhej në këtë artikull, përcjell Demokracia.com.
Çdo B-2 hodhi rreth 16 bomba të drejtuara nga sateliti 2,000 paundëshe, tha Gjenerali i Brigadës Leroy Barnidge Jr., komandanti i bazës duke treguar për bombardimin në ish-Jugosllavi. Ai nuk dha detaje mbi objektivat ose dëmet e shkaktuara, por zyrtarët e Departamentit të Mbrojtjes kishin thënë se ato përfshinin bunkerë komande dhe sisteme të mbrojtjes ajrore.
Siguria e aeroplanit dhe ekuipazhit ishte sigurisht një shqetësim i madh për Pentagonin. Çdo B-2 kushton mbi 2 miliardë dollarë (kostot totale të zhvillimit kanë qenë lehtësisht 10 herë më të larta), dhe kritikët e tij kanë sugjeruar se nuk është vetëm avioni më i shtrenjtë ndonjëherë, por edhe një nga elefantët e bardhë më të kushtueshëm.
Avioni që shmang radarët ishte projektuar për të transportuar armë bërthamore në territorin e Bashkimit Sovjetik, një kundërshtar që nuk ekziston më. Me shpërbërjen e perandorisë sovjetike, mbështetësit e B-2 sugjeruan se rrezja e tij prej 6,000 miljesh do ta bënte atë ideal për transportimin e armëve jo-bërthamore.
“Debutimi luftarak i B-2 u bë në vitin 1999, gjatë Luftës së Kosovës. Ai ishte përgjegjës për shkatërrimin e 33% të objektivave të zgjedhura serbe të bombardimeve në tetë javët e para të përfshirjes së SHBA-së në Luftë. Gjatë kësaj lufte, gjashtë B-2 fluturuan pa ndalesa për në Kosovë nga baza e tyre në Misuri dhe mbrapsht, duke fluturuar pa ndërprerje për në Kosovë, duke zgjatur gjithsej 30 orë. Edhe pse bombarduesit kryen 50 fluturime nga një total prej 34,000 fluturimesh të NATO-s, ata hodhën 11 përqind të të gjitha bombave”, kishte thënë në një artikull eksperti i aviacionit, Willie Bodenstein.
